Milanka ten kabelu bedju

Ku lagua na odju, Milanka xinta na txon na pe di si mama. Inda si mama ka kumesa pentia-l, mas dja’l sabia ma ta baba due. Era sabadu, dia di laba i pentia kabelu. I mama, na kel dia, ta fla-l p’e xinta na si pe, ta po-l kada perna riba kada ladu di si onbru pa pode komesa “kel longu prusesu di dumina juba”.

Timenti el ta tentaba fika sen mexi peranti puxons di kabelu pa mama ka sanha, e ta pensaba i perguntaba si kabesa pamodi ki mundu da-l un kabelu ton runhu, diferenti di kel di ses amiga di skola, ki tinha kabelu kunpridu, roladu, masiu. Si kabelu era gros i duru. Debi ser e erda-l di algun parenti lonji arabi ki dexa si mama ku si primu kel kor douradu sima kanpu di trigu k’e ta odjaba na tilivizon i dexa pobri Milanka ku kel kabelu duru i feiu.

 “au” – Milanka xinti si kabelu ta stika na kakaruta i uns fiu txiga rinka…lagua dixi na butxetxa. Kel butxetxa salienti ki el erda di si papa, ki ba buska-l na se donu, pai di si mai, Sinhor di la di São Miguel, Ilha di Santiago, disendenti di skravu, ka sabedu kal skravu, pamodi Purtuges paga nos nomi ku nos storia.

Milanka skesi di fika ketu, e mexi i e leba un palmada!

– Ah, nha genti! Mama, pamodi? Ta due…

– Sta-u ma N kre sta li, nha fidja? Ami N ka ten kulpa si bu sai kabelu bu pai. Fika ketu favor! – si mama sanha nel

Na kel tenpu, ka tinha kremi pa kabelu bedju, so disfrizantis pa bira kabelu moli, disfrizantis ki ta prumeteba milagri kontra kabelu bedju. Eransa di nos pasadu negru, skravu, atrazadu i ignoranti. Si ki nu ta inxinada desdi pikinoti. Si minina mistisu kaza ku pretu, gentis ta pidi Deus pa fidju sai kabelu di mama!

Prumeru kuza ki nu ta inxinadu, e ka gosta di nos kabelu bedju. Nu ta dobra spritu pa nu sigi ditadura stetiku branku, ki ta disidi kuze k’e bunitu.

Ku dizoitu anu, Milanka ba studa fora i la k’e atxa xansi di konxi raís di se kabelu pa prumeru bes. La el ka tinha dinheru pa ba disfriza i el tevi ki dexa kabelu kria. E ta pasaba mon na kakaruta, e ta xintiba si raís masiu i sabi di toka. Kel la po-l pergunta si kabesa si e pudia dexa si kabelu kria sen poi kes kremi p’e podi larga-l i asi tapa se oredjon, se odjon i se denton.

Kel la foi primeru bes k’e kebra korenti, si primeru gritu rivolta, primeru batalha k’e ganha…primeru di txeu batalha ki inda, komu mudjer afrikana, e tinha pa frenti.

Ilustração @Gina Cruz

3 comentários em “Milanka ten kabelu bedju

    1. e verdadi, nu inxinadu ma pentia ta due mas kantu nu prendi pentia nos kabelu nu intendi ma em vez di tenta adapta a padron di algen ke diferenti di nos nu mesti kria nos propriu metodo ki ta sirvinu
      obrigadu pa komenta e partisipa di debate 🙂

      Curtir

Deixe um comentário

Preencha os seus dados abaixo ou clique em um ícone para log in:

Logotipo do WordPress.com

Você está comentando utilizando sua conta WordPress.com. Sair /  Alterar )

Foto do Google

Você está comentando utilizando sua conta Google. Sair /  Alterar )

Imagem do Twitter

Você está comentando utilizando sua conta Twitter. Sair /  Alterar )

Foto do Facebook

Você está comentando utilizando sua conta Facebook. Sair /  Alterar )

Conectando a %s