Juliana spia pa tras

Juliana tinha 14 one. Pel kor d’xuklate, kimode pa sol, kbel krespe lor, sintura fine, perna kunpride. Al tinha ardode odje azul d’se bisavo, marinher ingles ke ta binha kariga sal na Porte, na Bubista pa liva pa Merka. Al ta vivia al so ma si mai. Si pai nunka al ka ta udjaba-el, s’es pasaba un na ote, al ta finjiba mo al sta destraide. Ar falaba muite rare un kotre.

Otrora si mai era um mdjer bnita, ma trabodje d’sol a sol i priokupasaun d’po kmida na meza tinha kriode ruga funde na si roste, mon antjode divide a trabodje i un tristeza na si olhar mesmu konde al ta fazia un surize.

Juliana ka ta pinsaba na nada ke ta pasaba, al ta utxaba pamode vida era asin i mo un dia al ta binha vive mesme papel de si mai. Asves al ta pinsaba: ke papel era ese? Asves kara de si mai ta parsiba ke tude koza menes ke felisidade, kel k’al t’udjaba na telenovela. Si mai ka ta gustaba de papia na ese asunte. Al ta flaba el “Ise ka e pa bu idade”.

Un dia al kunxe un rapas de nome Julião. Julião era olte, stiloze, odje moda odje d’pexe, vos roke. Ar truka olhar i Juliana trime tude korpe. Na dia seginte i dias depos, Julião kunpanha Juliana i asin nase si primer amor. Juliana sabia poke sobre amor, ma u sufisiente k’al tinha udjode na telenovela. Asin, al kradita na palavra sabe d’Julião, al utxa normal antriga si korpe na mon d’Julião.

Alguns mes pasa i Juliana parse gravida, ke 15 one d’idade sen sabe u ke el ta faze. Si mai fla mo ar divia kazaba, ma afinal Julião ka kria ten mas fidje. El era kazode i tinha fidje sufisiente.

Mai d’Juliana kei na vergonha d’munde.

Mesma manera ke pai de Juliana, Julião dzaparse na munde.

Pur fin, Juliana fka al so sen sabe manera ke tude kuntse, ta vive mesma storia d’si mai moda tinha side storia d’si avo tanbe … so largode na munde.

Konfuza, Juliana ba na kaza d’ome mas bedje d’si puvoasaun p’al ba pdi-l kunsedje.

“Snhor Marine, N miste buse ajuda, buse fla-m kze ke N ta faze k’es mnine? Nha mai ma nha avo kunpri ses dstine, ma pa mi kel la ka ta parse-m nada ke flisidade. N kre studa i faze diferente, ma N ka sabe manera k N kaba pur faze moda nha mai ma nha avo.”

Ome grande raspunde: “Nha fidje, N ka pude mustra-be kaminhe pamode so bo e ke sabe unde bu kre ba. Nu entonde, N pude fla-be ke ka ta faze mal bu vulta pa bu pasode pa ba bzia algu ke bu skse i ki e presize pa bu kaminhada.”

“Ahn?!?!” – Juliana fla konfuze. Afinal es ome bedje ka sabia nada.

“Sankofa nha fidje. Nu ta repti storia d’nos antpasode. Pa nu kibra roda de dor i sufrimente, nu ta miste vulta pa pasode primer pa nu pude antinde-l i so dpos anda na diresaun d’nos dzeje.” – Mone Marine ka fla-l mas nada…

Juliana sei konfuza d’kaza d’ome bedje, ma sen el da konta al diriji pa kaza d’se avo unde el ba uvi, pa primer ves, storia d si familia.

Ilustração @ Gina Cruz

Uma resposta para “Juliana spia pa tras”

  1. Kel li debe dja kontese ku txeu minina kabuverdiana, perpetuandu un siklu visiozu. Gentis grandi i skola debe papia ku adolesentis tenpestivamenti pa pripara-s pa enfrenta riskus dikorenti di ivuluson di ses korpu. Stadu i forsas vivu debe konbate irisponsabilidadi paternal ku diterminason. Es irisponsabilidadi e parsialmenti anplifikadu ku dizenpregu. Parabens! Forsa!

    Curtir

Deixe um comentário

Preencha os seus dados abaixo ou clique em um ícone para log in:

Logotipo do WordPress.com

Você está comentando utilizando sua conta WordPress.com. Sair /  Alterar )

Foto do Google

Você está comentando utilizando sua conta Google. Sair /  Alterar )

Imagem do Twitter

Você está comentando utilizando sua conta Twitter. Sair /  Alterar )

Foto do Facebook

Você está comentando utilizando sua conta Facebook. Sair /  Alterar )

Conectando a %s

%d blogueiros gostam disto: