Milanka bo ka branka nau!

Milanka disfriza kabelu ultimu bes na dias di viaja pa Portugal pa ba studa. E pasa ultimus mes ta konta dia di bai, liberdadi…konxi mundo e spadja pe…kel mundu di revista Bravo, ki e ta kumpraba na kioski la na prasinha Skola Grandi, era koloridu e bunitu.

Milanka sempre ta leba revistas ta pensa modi ki ta serba vida na kes lugar, pa undi ki txeu bes algen ta mandaba el. “mondronga bo ka di li” – es ta flaba. Manenti Milanka ta pensaba ma um dia ta parseba um prinsipe aventureiru pa es fuji na barku pa lonji ou ma e nasiba na otu país, ku otu nomi e na otu korpu, undi ki tudu algen ta aseitaba el e ka ta gozaba ku el. Na kel vida ke ta sunhaba e tinha namoradu, el era balenti, el sabia kuze ke kria, kuze ki e-l era!

Txeru disfrizanti kordal di se fantazias…“Dexa di trosa minina, abo? Milanka? Ta fuji na barku? Nem di li ti la bu ka ta bai ago fuji di barku”

“Milanka bo kanpresta!” se ladu ka bali fla si ladu sunhador. Tinha munti Milanka dentu di Milanka…ku tempu nhos ta konxes tudu…nem el ka konxes tudu inda.

“Biaaa! Tra-n kel kuza li di kabesa nkre txiga Oropa ku kabelu!” Milanka grita kantu txeru disfrizanti intupi-l naris…

….Dja na Portugal na prumeru dia d’aula e bai skola, ku se kabelu bedju disfrizadu largadu, riba kosta, pensandu me staba meio ki asi-asi, pa primeru enkontru ku ses kolega branku moda el, ki ka ta txoma-l brankela nem djobe-l di rabes. Finalmenti e ta enkaxa e ta fazi parti di algun kuza.

“Ahhh Milanka bo ka branka…pa bus kolega portuges bu ka branka…” – tinha un Milanka prufeta…di disgrasia…

Na primeru pasu ke da pa entra sala Milanka deskubri kela. 40 odju rabida pa porta djobe-l di pe pa kabesa, alguns ka guenta ri, lugar tinha so la na fundu e tevi ki pasa na meiu tudu kes minix pe xinta na ultimu fila.

Uns pergunta-l si e brasileira, otus di undi ke bem si tem kaza, si kaza tem tetu, si strada tem pedra, si tem avion…otus fla-l me tem kor di porku, otus nem ka papia kue-l…

Milanka ba kaza spantadu e tristi! Forti konfuzon? Pamodi ki se kor ku se kabelu e taun inportanti pa fazi algen gosta di el? Bu ta disfriza kabelu pamo e bedju pa vira finu lambidu ka sta bon, bo ka preta sufisienti la, ka branka sufisienti li…na kaza kabelu e bedju dimas, era po saiba vovo mondronga. Ma nha genti nhos dexa mininu ser El!

Tantus pergunta na kabesa di Milanka…tantus vaziu…tantu indifinison…

E txiga n akaza e subi riba kadera e papia:

“Minix, nu foi enganadu, afinal disfriza kabelu ka sufisienti, si kre nu for branku, senpri es sta ben odjanu komu strangeru…asi ki Milanka bira ativista na komunidadi. “Nos e tudu Afrikanu e nos colonizador inxinanu ma nu debi rejeita nos origen, e flanu ma si nu for mas klaru nu ta ser midjor, nu ta dadu mas regalias, verdadi poren e ma nunka nu ta ser odjadu di igual pa igual. Enton midjor e nu uni komu povu e nu ergi nos identidadi, si kre uns mas branku, otus mas pretu! Nu ama nos kabesa e nu ama kumpanheru, nu buska nos storia, pamo povu konsienti e povu ki tem opson, ki ta skodji si kaminhu!”

Um comentário em “Milanka bo ka branka nau!

Deixe um comentário

Preencha os seus dados abaixo ou clique em um ícone para log in:

Logotipo do WordPress.com

Você está comentando utilizando sua conta WordPress.com. Sair /  Alterar )

Foto do Google

Você está comentando utilizando sua conta Google. Sair /  Alterar )

Imagem do Twitter

Você está comentando utilizando sua conta Twitter. Sair /  Alterar )

Foto do Facebook

Você está comentando utilizando sua conta Facebook. Sair /  Alterar )

Conectando a %s