Prazer Txika, ami e bu kriansa interior

Txika txiga na kaza dipos di sol kanba!

Sin ki e entra mama pergunta-l pamo ke sta txoraba. E kori mon na rosto e fla-l: “ka nada nau mama!”

E subi pa kuartu i kumesa tra ropa i fulha na txon, ah si e pudia duspiba se pele i dexa di ser txika pe vira otu algen. Un mudjer ki tivese koraji ki fose bunita, moda kes mudjer di novela ki ta konsigi tudo ki kre.

E djobi na spedju, e spia se korpu nu…e toka se peli, e da um volta kompletu. E repudia estria ku pneu. 

“Nem pa-n tinha dinheru…n ta kompu uns kuza li ku la. “Nka sabi pamo ki nos e pobri…” – e suspira dizanimadu!

Kel vozinha txoma-l: “pssssttt…nu ka kombina mo sta spia pa dentu? Larga spedju, e sta devolveu bu pensamentu.”

“Ahhh?” – Txika nada ka intendi. “Ta da po larga misteriu? So po papia klaru….”

Se voz interior respira fundu: “Pasiensia Universo, kel alma li mesti txeu trabadjo inda, da-n kalma ki n mesti pa n gia-l!”

“Po gianu inton ne? N pensa bo e mi nos e um so. Fastenta” – Txika dja tinha biku puxadu!

“Ai ai Txika, mi e bu kriansa ferida, kel ki ta xinti abandonada i ki  prendi xinti feia i diferenti. Nos e un so sin, mas mi e pasadu, nta izisti so na bu kabesa i n podi dau dos kuza: limitason ki ta trazebu dor i sufrimentu ou kriatividad ki ta djuda-u expandi e kria. Mas kala bu obi!”

I vozinha kontinua:

“Bu spedju ta devolveu kel ki bu ta pensa di bo. Si bu prendi ama bu kabesa, gosta di bu korpu i xinti bunita, bu ta odja un reflexo bonito. Si bu insisti na maltrata bu kabesa, kexa di estria, di korpu asi ou asadu, spedju ta mostrau feiura. Spedju ka ta fazi majia, e ta mostrau kel ku sta odja…nada mas.” – vozinha suspira kansadu i e torna pidi universo forsa pa Txika! 

“Mas parsen nu kombina na pedra mo sta ba visitaba bu papa” – vozinha insisti.

“Nka ta konsigi, n ka ten koraji” – Txika baxa kabesa i lagu kumesa kai na buxexa otu bes.

“Kumesa si, fitxa odju e lembra modi ki foi, kantu ki e bai se kaminhu, volta pa tras, volta na tempu ti ki bu txiga pertu mi i xinti, simplesmenti xinti. Pergunta bu kabesa si bu xinti abandonadu, si bu xinti sen amor, si bu xinti vergonha na skola, si bu xinti diferenti di bus kolega ki ta moraba ku ses papa. Bu sabia ma pa minina, se papa e se primeru parseru? Si bu xinti rejeitadu ou abandonadu pa bu papa, oras ki bu kria, bu ta buska bu papa na bus relason e bu ta atrai algen indisponível. Pamo bu kriansa interioriza ma kela e u ki bu devi spera. 

Pa bu muda, bu tem ki spia pa bus ferida e kuras, kura bu kriansa ferida ki ta xinti abandonado, dal amor, ganha konsiensia di sis nesesidade, asi bu ta para di buska razon fora di bo i bu ta spia pa dentu, undi ki bu ta ser protagonista di bu storia. Alves ka ta ser pusivel bu faze-l bo so, bu ta prisiza di ajuda. Mas gosi ki dja bu intendi un poku mas, e ora di abrasa bu kabesa i kumesa bu linda jornada. Un jornada di autokonhesimentu ki ta leba-u pa maior storia di amor di bu vida, kel storia di bu amor propriu!”

Txika ka respondi i se voz atxa ma staba bon pa oji e brasa-l filis. Afinal nunka e konsigi papiaba ku se adultu i oji tinha sido un dia inportanti. Ku pikenus vitoria es ta txigaba bon portu.

Deixe um comentário

Preencha os seus dados abaixo ou clique em um ícone para log in:

Logotipo do WordPress.com

Você está comentando utilizando sua conta WordPress.com. Sair /  Alterar )

Foto do Google

Você está comentando utilizando sua conta Google. Sair /  Alterar )

Imagem do Twitter

Você está comentando utilizando sua conta Twitter. Sair /  Alterar )

Foto do Facebook

Você está comentando utilizando sua conta Facebook. Sair /  Alterar )

Conectando a %s